Өткен аптада Испаниядағы Radio Voz радиосының Un café con Eva радиобағдарламасында Димаш Құдайберген орындауындағы «Ave María» және «The Phantom of the Opera» композициялары шырқалды.

Эфир Dimash Qudaibergen Fan Club Oficial España / La Gran Voz Kazaja қауымдастығының қатысуымен өтті. Бұл ұйым қазақстандық өнерпаздың шығармашылығын Испанияда белсенді түрде насихаттап келеді. Бағдарламаның құрметті қонағы ретінде журналист әрі Димаштың жанкүйері Йоланда Гарсия келді.

Журналист Димаштың шығармашылығы әлемнің түкпір-түкпіріндегі тыңдармандарға Қазақстан мәдениетін танып-білуге мүмкіндік беретінін атап өтті:

«Оның арқасында біз өзге елдер мен олардың мәдениетін де танып біліп жатырмыз, ал қазақ мәдениеті бізді ерекше тәнті етеді».

Тағы бір маңызды іс-шара — Испанияның La Voz de Asturias газетінде жарияланған сұхбат болды. Журналист Эстер Родригес Dears қауымдастығының өкілі Эстер Сота Эгисабальмен сұхбаттасып, Димаштың шығармашылық жолы, халықаралық жетістігі мен әлемдік жанкүйерлер аудиториясы жайында әңгіме дүкен құрды. Материалдың электронды нұсқасы 11 мамыр күні жарық көрді.

Сұхбат барысында Димаштың жанкүйері әншінің шығармашылығымен танысқаннан кейін Қазақстан мәдениетін, дәстүрі мен қазақ тілін тереңірек зерттей бастағанын айтты:

«Мен қазақтармен, ең болмаса қарапайым деңгейде болса да, сөйлесе алғым келеді. Ең бастысы — Димаштың әндерінің мағынасын әлдеқайда терең түсінгім келеді».

Жанкүйердің айтуынша, қазақ тілін меңгеруі оған Нью-Йорк пен Будапешт қалаларындағы концерттер кезінде сүйікті әртісімен сөйлесу мүмкіндігін берген екен.